میرے یاروں کا ؟ کچھ نہیں ہو گا ؟
غم کے ماروں کا ؟ کچھ نہیں ہو گا ؟
اب ہمیں ڈوبنا پڑے گا
اب کناروں کا کچھ نہیں ہو گا !
آپ صحرا کو سبز کر دیں گے
آبشاروں کا کچھ نہیں ہو گا ؟
نامرادوں کو سب ملے گا مگر
غمگساروں کا کچھ نہیں ہو گا
اک عدد گونج نے سوال کیا
کوہساروں کا کچھ نہیں ہو گا ؟
اب مجھے کوئی بھی نہیں درکار
اب سہاروں کا کچھ نہیں ہو گا ؟
ہم کو اب زندگی ملے گی فقط ؟
اب خساروں کا کچھ نہیں ہو گا ؟
زرد ہوتا ہوا بدن بولا !!
اب بہاروں کا کچھ نہیں ہو گا !
آپ کو روشنی پسند نہیں !
چاند تاروں کا کچھ نہیں ہو گا ؟
ہر کوئی خوش رہے گا مگر
ہم بچاروں کا کچھ نہیں ہو گا !
💔
No comments:
Post a Comment